Ray oh! Iny zanako iny (R.V.K)

Ray oh! Iny zanako iny
Na aiza n’aiza hombany dia,mba tantano hatrany
Arovy amin’ny loza sy atambo samy hafa
Ao i Fandresena,Mihoby,ary i Tsanta

Tolory azy ireo ny fahasalamana
Ary ihany koa ny hery sesehena
Fa ity no tena iriko Ray oh! Ry fahazavàna
Sakano tsy hania fa,tolory fahendrena

Raha mitady ho kivy dia,tohany herin-tsaina
Tsiahivo hahatsiaro,ny hariva sy maraina
F’ianao no Andry ,tsara sy azo hitokiana
Mihaino azy hatrany amin’ny andro fahoriana

Tefeo ny fony kely,hanoa sy hankatoa
Ny anatray sy Neny ary,ny Teninao koa
Arovy tsy ho voatarik’ireo,naman-dratsy
Mba ho tsara indrindra amin’ireo voa nafafy

Omeo azy koa ny saina matsilo
Mba hahatontosany ny adina hataony
Na any am-piangonana,eo ambony dabilio
Na any an-dakilasy,toy ny efa fanaony

R.V.K
--------