FOTOANAN'NY ASA (Ravo)

Fotoan'ny asa

izao no fotoanan'ny asa
ka mifohaza amin'izay,
afoizo ny fandria-mafana
sao ilaozam-balala eo ialahy.

izao no fotoanan'ny asa
ka mba kingakinga ry akama,
mahaiza mandray ravin-deno
fa tsy ilaozana misalasala.

izao no fotoanan'ny asa
ka aza ilaozana mitatasiaka,
tsy tranom-borona io ka ho vitan'ny vava
na hanaovana vovon'aliaka.

izao no fotoanan'ny asa
ka aza variana mitokona,
tsy hisy sotro hiakatra am-bava
raha tsy ny tanan'ialahy no mivonkona.

izao no fotoanan'ny asa
ka mitsangana dieny malaina,
tozohy ny dian'ialahy
fa aza miandry hafa antenaina.

(tononkalon'i Ravo na André Vonjitsoa RAKOTOARIVELO)
--------