Tiako ny Malagasy (Samaritanina)

Gasy aho,
teraky ny tany,
Gasy ray sy reny,
Gasy saina sy fiteny;
Gasy foana, Gasy hatrany.

Gasy aho,
tia ny taniko,
ny fombany rehetra,
ireo lasa sy mitoetra,
ankafiziko ary mamiko.

Gasy aho,
ka mandala
ary tena mankato
ny soatoavin’ilay fo
izay mitia tsy mankahala

Gasy aho,
hiezaka hiaro
haneho izay tsara
holovain’ny ao afara
ary soa ho an’ny maro

Gasy aho,
na aiza alehako,
Gasy saina sy fanahy
tsy hadinoiko fa ho tsiahy
Ilay Gasikara reharehako

Gasy aho,
izay no ananako;
na hiala izato aiko
tsy ho afaka ao an-tsaiko
Fa i Gasikara no tananako.

Samaritanina

12/12/2015
--------