Sarotro (Aingampanahy Feon'ny Saina)

Sarotro!

Ary nisy volon'andro notsatsoin'ny fahanginana,
Tao am-pon'ny lohataona fiotazan-kamamiana!
Toy ny riakan'alahelo hiandrandrana fiononana,
Nefa mbola injao manosaka antontan'hakiviana.

Tsy mba tony, tsy matory mihotakotaka he ny foko,
Tsy tafandry fa mandoatra ny hararetrany marefo...
He ry vetso takariva izay mandranitra toloko,
Taminao dia taminao no nateraka ny sento!

Hosamboriko ary ve ny alim-bolana any ho any?
Ho ampalesiko eto an-tratra irony tara-bolafotsiny?
Sa ny antsalim-pivahiny no hamahoako tomany?
Sy hamboleko fitoniana amin'ny laingon-drotsirotsiny?

O! Hongoty ry hariva ity sampahon'alahelo
Andrimbino sila-bolana any an-dambanao ny feriko,
Ndao fehezo tsy hitsonika ka hamoha ny velovelo,
Sakambino e ny fanahy sy ito fo izay manireriko!

Aingampanahy FS
--------