DIMY TAONA SAHADY - andony

Azo vakiana?

I-Efa dimy taona sahady
Ilay indray Alahady
Nitataovanay ny rahona
Dia ny rahon’ny fisaonana

II-Dada a! dimy taona anie izay
No nandaozanao anay
Ka i Mama samy irery
No niatrika ady teny.

III-Tena mafy taminay
Raha izay dimy taona izay
Fa ianao ilay nihantana
No nandao anay tsy tàna

IV-Natao ny fitsaboana
Sy izay rehetra azo natao
Hatramin’ny vavaka fifonana
Mba hitazonana anao

V- Kanefa ianao tsy tàna
Satria ny anao efa voalahatra
F’Ilay Nahary manam-pahefana
No efa niantso anao hitsahatra.

VI-Raha azoko natao
Dia ho niresaka aminao
Hoe: nanahoana izahay
Tamin’izay dimy taona izay

VII- I Tiana sy Hanitra
Dia samy mila ravinahitra
Ary izahay sy hery  
Dia samy mikofokofoka eny

VIII-Tehanotany angamba ianao
Hoe: manahoana izay
Ary mba aiza ho aiza izao
izy roa mirahalahy?
IX- I Andry sy i Faly dia samy mbola mianatra
Ary tsy maintsy nanaraka an’i Hery any avaratra
Ka na i Mama koa aza tsy tamàna irery
Fa dia nanapa-kevitra hanakaiky an’i Hery.

X- Tsy hoe andro miavaka ny androany
Ka dia nahatsiarovako anao
Ary tsy hiverina hitomany
Na hifaly amin’izao dimy taona izao.

XI- Fa raha vao nifoha ka nahatsiaro anao
Dia noraisiko ny peniko fa hiresaka aminao
Ka ity no atokako ho tsangambatonao
Ho fahatsiarovana amin’izao dimy taona izao.

XII- Ndao matoria ô ry DADA TIAKO
      Ka ny vavaka ataoko ho faniriako
       Dia ny hifankatiavanay amin’ny taona rehetra sisa
      Ary ianao kosa hiadana ao am-paradisa.

Andony
26 Janoary 2014

Hevitra mandeha

andony (03/01/2015 09:01:21)

Tena fiainanay io nosoratana io. I Tiana no vavimatoa arakarahin'i Hery dia izay vao ny Andony i Hanitra faravavy arakarahin-dry Faly sy Andry

Mombamomba

Mpanoratra : andony

Nampiditra : andony
Daty : 11/03/2014
Mpamangy : 1471
Mankafy : 1

Tononkalo hafa

NY NOELINAY ANIO
ITY NOELY ITY