You are here: home > Vetso

Mbola hisy - Clarisse Ratsifandrihamanana


Mbola hisy takariva ho hazavain'ny volantsinana
Hibanjinanao tsy satry iny habakabaka iny
Ho tsinjonao mibaribary "volan'iny tsy hanombinana,"
Toa ilay niarahana nijery tamin'ny andron'ny fahiny

Mety koa anefa hisy rahona hisavorovoro
Ka ho takona amin'izany ilay hazavany soa madio
Ho toa izay ilay hasambarako izay narodanao hikoro
Ka hitomaniako irery amin'io fotoana io.

Mbola hisy ali-maizina, hanofisanao ny lasa
Hitampodian'ireo fahiny izay niarahanao tamiko
Ka hahatsiarovanao mazàna ireo zavatra voakasa
Ary handrenesanao indray ny sentosento sy tomaniko.

Mety koa angamba ianao, mety tsy hahita tory
Fa seranin'adin-tsaina amin-javatra ankiray
Ho tadidinao ny amiko... tsy manozona aho tsy akory
Fa hivavaka ho anao amin'izay fotoana izay.

Mbola hisy sendrasendra hahatsiarovanao ny lasana
Ho hanenenanao angamba ilay niantsoako hoe "andraso !"
Satria mety amin'izany, ho efa vovoka any am-pasana
Ito tenako mahantra izay nianjadian'ny ankaso.

Eny, mety hisy izany... nefa izao no hiangaviako
Aza atao maharitra ela ny fandefasanao fisainana
Fa ny hasambaranao... izay no hany fifaliako
Efa anjarako ny jaly araka ny tendrim-piainana.

Mbola hisy ! Eny hisy... na ho ela na ho haingana
Hitampodian'ireo tsiahin'ny fahiny... tsy hipody
Angamba ny endriko mihitsy no ho tsinjonao mivaingana
Kotsakotsan-dranomaso... nefa tsy miantso tody.

Mbola hisy marimarina ny tampodin'ny tsiahy
Fahatsiarovana no sisa, handrotindrotika fanahy.

Sokajy : Fitiavana

Hevitra mandeha

hery (22/09/2019 18:59:53)

Ny henjana :-o

rfanomezantoky (24/09/2019 14:14:21)

Hanjana ny mpanoratra fa henjana koa ny namabarany ao amin'ny tononkalo

Hametraka hevitra

Midira aloha

Mombamomba

Mpanoratra : Clarisse Ratsifandrihamanana


Nampiditra : ikalamako
Daty : 21/09/2019
Mpamangy : 208
Mankafy : 2

Tononkalo hafa

Hitako nitafitafy.
Fantatro
NY TENA TIA
MAMA