Hono? (Eliza Freda)

Nantsain'i ikalamako
(Nalaina tao amin'ny vetso.serasera.org)
O, ry kintana voahangy,
Izay mitsidika ny tany,
Lohalalan'ny mpamangy
Avy any alavitra any!

Izato endrikao diamondra
Toy ny anja-bolafotsy,
Dia nirahina hitondra
Irony tara-drotsirotsy.

Inona, ry kintana iny,
No nitiavanao hifindra?
Ny hiara-mivahiny
Ve no tsy aritrao indrindra?

Tsetra ve no mba nanery,
Sento ve no nahataona?
Ka netezanao hijery
Itony taninay misaona!

Moa hilaza "misitery"
Zava-miafina ao am-pita,
Ka hamboraka ny miery
Ao an-koatry ny tsy hita.

Misy hafatra ve "any"
Horesahinao angamba;
Sa mitsidika eto ihany
Mba hitantana ny jamba?

O, ry kintan'ny hariva,
Mandra-podinao hatory,
Dia vangio ny toerana iva
Ka tsinjovy ny olona ory!

Dia ety no mba atopazy
Itony taratrao tsy lefy;
Izany herinao fohazy
Hampisava ny fo tomefy.

Ka ny nofin'ny Poeta
Nindran-kery avy teny,
No hanafa-ketaheta
Ilay fisainana manjeny!

O, ry kintana, todiho,
Ity Fanahiko mimalo;
Tairo kely, ka bitsiho
Ndrao sodoky ny mandalo.
--------
Rohy:
681 1
Hametraka hevitra
Midira aloha
Momba ny tononkalo
Mpanoratra : Eliza Freda
Nampiditra : jantina
Daty : 08/08/2019 19:44
Antsantononkalo
Nantsain'i ikalamako
© Eugene Heriniaina - serasera.org 1999 - 2024 - page load 0.0095