TSY HO FATY AO AM-PO (Fré)

Isan-taona toy izao isika samy mahatsiahy
Ny herim-pon'ny Malagasy tena vonona sy sahy
Hanohitra ny fanjanahana amin'ny endriny rehetra
Mampahory, mamparary,... Fangejana anterisetra.

Isan-taona toy izao dia mitamberina ao an-tsaina,
Fa maro ireo nisikim-ponitra, nanao vy very ny aina
Tsy nataho-masomena, niantrana am-bava basy
Fa vontompaniriana lalina hanafaka ny Malagasy

Indro, isan'andro kosa isika no misitraka ny soa
Ka nandova fahafahana sy fiadanam-po
Nahazo indray ilay fiandrianana, tamintsika hatramin'izay
Samy afaka mirehareha ary mandry fahizay

Fa, isan'andro koa anefa dia takiana aminao
Ny hihazona ny fahafahana efa am-pelantananao
Ka tsy hanaikinaiky foana hanakalo na hivarotra,
Hijoro ho tena Malagasy na ho mora na ho sarotra!

Herinirina Frédéric
--------