SATRIA AHO NITIA... (Fredy Jaofera)

Mbola tsisy niantsa

Hangataka antsa
(Nalaina tao amin'ny vetso.serasera.org)
Satria aho nitia dia tsy noraharahina marina,
navela ho kamboty sy ny sisa tiako hitarina ;
satria aho nitia dia nolazaina ho hafetsena,
tsy nahina akory raha nanan-pahendrena !


Satria aho nitia dia nambara hoe : adala,
tsy nandaniana rora fa tsy zanaka malala ;
satria aho nitia dia nambanina tsisy farany,
nozonina mihitsy hahafaty 'tony anarany !


Satria aho nitia dia nizaka tsy eran'ny aina,
tsy navela hahatoky fa manana antenaina ;
satria aho nitia dia tsy nitsahatra nijafa,
navela hiaina teny sy toy ny olon-kafa !


Satria aho nitia dia tsy nisy dikany taminao,
navela ho singan-drery sy ho ory lava izao ;
satria aho nitia dia tsy novohaina varavarana,
nesoina lalandava fa tsy zaza nisasarana !...



Fredy JAOFERA
--------
Rohy:
Sokajy : Alahelo
1513 1
Hametraka hevitra
Midira aloha
Momba ny tononkalo
Mpanoratra : Fredy Jaofera
Nampiditra : 3004
Daty : 03/03/2005 00:54
Antsantononkalo

Mbola tsisy niantsa

Hangataka antsa Hampiditra feo
© Eugene Heriniaina - serasera.org 1999 - 2024 - page load 0.0105