manahirana ny miaina (Gérard RANAIVOZANANY)

MANAHIRANA NY MIAINA


Asa raha diso ny fiheritreretako
Mandinika izato lalanan’ny fiainana
Ka andeha ary henoy f’ity ny hetahetako
Diniho tsara dia hoento am-pisainana

Fa nahoana ireo olona nahavita ratsy ?
Sy namohafady tsy fanao ianao
No mateza fiaina, ary toa be vatsy ?
Sa izany no lalàn’izao fiainana izao ?

Nefa misy ireo manitra mamerovero
Toy ny tantely izay manana mamy
Nafoy vetivety toa alaina sy atero
Lasa natelin’ny fasana any

Jereo anie ireo olo-nigadra imbetsaka e!
Fa miriharia sy bolangina tsara
Toa lavitra azy ny enta-mavesatra
Ary ny fahoriana, tsy ao anatin’ny anjara

Diniho kosa ireo mpanao ny soa
Manampy raha misy mahazo ny sasany
Vetivety dia maty ary lavo tokoa
Tsy navela akory mba hamita ny asany

Raha toa ka omena safidy malalaka ?
Ka hanontaniana ary izay hevitrao
Ny fasana ve sa hihaina maharita
Ny tsara , sa ratsy ;valio ka lazao

Hisafidy ny tsara, ianao tsy hateza
Dia haka ny ratsy satria te hihaina
Sarotra ihany ka dia mahereza
Manaova ny soa , fa aza malaina

Gérard RANAIVOZANANY
--------