SAMBATRA HONO (Gérard RANAIVOZANANY)

SAMBATRA HONO


Sambatra hono f’izaho lasan-davitra
Satria tsy voakasiky ny fahoriana
sambatra hono no sady finaritra
Nefa aho la vitra fianakaviana

Raha misy zava-midona any hoany
Tsy sambatra aho satria miady irery
Ianareo rehetra miaraka ihany
Izaho aty singany toa olona very

Ny tena tsy zaka dia rehefa manembona
Ireo zava-niarahana fony taloha
Tadidinareo ve ireo kalo sy embona ?
Mahatsiaro an’ireny aho dia maharary fo

Tsaroanareo moa ilay i dada narary ?
Ny adin-tsaiko namoritra feno tomany
Ianareo rehetra toa rano sy vary
Izaho tsy mba afaka nandeha nankany

Nony nandao izy tsy hitako akory
Fa nantsoin’ilay tompony dia lasa nankany
Izaho tsy afa- nankaiza fa olona ory
Sambatra ve aho ho ohatran’izany ???


Gérard RANAIVOZANANY le 15 août 2006 à 21h33
--------