Petera sa Jodasy ? (Heriarilala Andriamamonjy)

PETERA SA JODASY ?

Ianao nanaiky foana teto anatrehako, nilaza ho tena tia
Tsy hisy fiatoana hanaraka ny halehako, hiaro ho doria
Nazoto ery nitantana, faly koa namihina fa tompon'ito foko
Tsy niakanakana rehefa nodinihina, tsy mbola koa nioko.

Impiry nivoady, nianiana injato kely fa tsy handao na oviana
Raha tsy izaho ilay vady d'aleonao miery, mamonjy ny fodiana
Raha iny tafasaraka, hono, ianao sy Isombinaina dia aleo tsy misy
Homenao malalaka moa ny zony mba hiaina fa tena tianao mihitsy ?

Dia nanaiky hatrany teo anatrehanay hoe tia sy tena babo
Miasa be mavàny, miasa ho anay, ny anay kay hevi-bado
Dia mandefa hafatra sy miantsoantso lava hoe manina te hihaona
Indraindray manasatra fa tsy mazavazava ny fandaminana fotoana

Dia renay any ambadika fa mandà mafy ho tsy mahalala anay
Izahay tsy maty arika fa mahatsiaro tsara an'ilay voady fahizay
Hoe na oviana na oviana dia tsy hisy hahasaraka
Impiry no nianiana fa na inona miseho dia ho eny foana hanaraka

Teto aho no sahirana, Petera sa Jodasy ilay mitoroka any ivoho ?
Ninianao navilana ho tantara ratsy ilay voadin'olon-droa
Tsy fandavan-tsotra fa nisy endrikendrika mba ho fanaratsiana
Mba tena mafy loatra raha niofo vetivetika ilay fon'olon-tiana.

Heriarilala Andriamamonjy 27-10-25 5:03
--------