SASANANGY SAMIHAFA (Heriarilala Andriamamonjy)

SASANANGY SAMIHAFA

Nisy lapa notafihina ka tso-drano no nalefa
Tsy teo raha notsirihina ny mpitarika ady anefa
Nandositra mialoha nanao takatsika ny kely
Ny sorona tokoa ilana anao manao vy very

Dia nisy olona nilamina nandia ny lalam-be
Raha tianao hofantarina, tsy mpandroba ireo ange
Ny mpitarika naratra, fa niara-niatrika ny nisy
Izay tratra aloha dia tratra, voasambotra k'indrisy

Nisy olona namotika miana-kendry mba mananatra
Mody mba mamotoka, mijoro, hono, fa filamatra
Ny rambony tsy ho tapaka no arovany amin'iny
Fa tsy izy hoe mpivavaka ka efa niova ankehitriny

Sasanangy samihafa ny diabe sy fandrobana
Raha jerena ange ny lasa, moa izao ilay fanovana?
Ny fahafaha-notakina, ankehitriny anefa aiza ?
Ny vahoaka ampijaliana, ny mpandoro no mitaiza ?

Heriarilala 07-10-23 15:13
--------