TSIKY KELY (Imbitika Rambala)

TSIKY KELY

Tsy voninkazo kanto
Notoazana maraina
No natolotrao ho ahy
Tsy feo milantolanto
Mandrontsina ny aina
Mankahery ny fanahy
Tsy fihetsika nihelatra
Na famantarana tsy hita
Fa TSIKY KELY menatra
TSIKY KELY nahavita

Tsy taratasy mamy
Izay nalefa na natolotra
Tsy hisy hahafantatra
Tsy bitsika hatrany
Am-po mipololotra
Ka nifatrapatratra
Fa TSIKY KELY monja
Nilazanao tamiko
Fa ao anatinao manonja
Manaiky hiaraka amiko

Tsy "eny" notononina
Na resadresaka hafa
Fa TSIKY KELY iray
Dia injay misamonina
Avy hatrany te hitafa
Ireto fo mifandray
Hendratrendratra sahady
Vinelombelon'ny fitia
Dia indreo mifampitady
Na dia mbola mikavia

Imbitika Rambala - juillet 89 - in ERI-MASO 2
--------