Indray andro any (Nasolo)

Mitsiky kely dia mitomany
nidify indray 'lay masoandro
Sa ve izany no eto an-tany ?
Tandrifin-drahona isan' andro

Ilay olon-tiako nitarainako
nanosika ahy toa nandao
Fa nahoana kay ny fiainako
no ranomaso lava izao

Impiry moa aho no mba nifaly ?
Azo isaina an-dratsantanana
Fa raha ny sento sy ny jaly
nampanarivo raha fananana

Na mafy aza nefa ny manjo
tsy ho kivy aho, tsy ho ketraka
ka ny alahelo ato am-po
zakaiko ihany na mavesatra

Manantena aho f'indray andro any
Ho foana hatreo 'reo fahoriana
Ka 'lay toloko sy tomany
Hiova tsikim-pifaliana
--------