Ilay jiolahimboto (ontsy)

Enjehina lava, atosi-bohon-tanana
Andosiran-davitra, tsy avela ho namana
Tsy topaza-maso, fa hiatakatahana
Fa fositra, hono, ka tsy azo amaharana.

Sokajina ho boto, ho mpibahan-dalana
Ilay faraidiny, satria tsy manana
Mampihaoka mandoa, tsy mba fandray tanana
Jiolahimboton'olona, olon-tsy vanona.

Endrey andihizana rehefa lasana
Tsy azo otronina, hatreny amin'ny fasana
F'izay mba mitsetra, dia hahita faisana
Na lolo sy avelo, tsy azony iraisana
--------