HAY... (Ravo)

Indro izy tonga indray, hizara hafaliana anaty tsikitsiky;
jerena ho tena namana mpiara-dia hamikiviky
amin'izay aleha sy hodiavina amin'ny fiainana,
rahalahy an'ala ho fitodihana hitarainana.

hay ...

sakanany ny lalana izorana ho amin'ny tsara,
fenoiny fandrika sy lomotra, handratra fa malama;
raha tokony ho fidirana ny eo am-baravarana,
eo no anokoany resaka tsy ho azo andinganana.

ny resany amin'izany, raha mba hoe mitafatafa
dia mitantara ratsy sy fifosana ireo hafa;
tsy ampy azy ny mandainga fa ny maloto aza loarany
hentina hanosoram-potaka ireo tsy hainy ihoarana.

angamba koa, an-takona, izay ataony tsy hay intsony
na mamonto tapakazo sy karazam-panafody
fa ny hita miharihary dia indro izy tonga indray :
tsy am-pahibemaso milalao ody fa mpamosavy mahay.

nosoratan'i Ravo, na André Vonjitsoa RAKOTOARIVELO
--------