MOSOARA TOKAN'IZAY (Riman'ny fou)

Sendra mba nandalo teny aho hanikeo,
eny amin'ilay teorana izay falehanareo.
Dia nahita ilay malalanao nitanondrika irery,
nisefosefo nitomany fa nahatsiaro tena ho very.
_
Mosoara tokana izay no hany mba namany,
ho fanantazan-dranomaso izay tsy voatanany.
iangonan'alahelo ka tsy maina hatram'izao
fa toa tsy mampino hoe vitanao ny nandao.
_
Izy sy izay mosoar'izay sisa no iray tsiambaratelo
tsy naniry ny hiaradia fa nampifandraisin'alahelo.
ianao no efa fitrainany, ianao no nahazatra
toa tsy nampino fa dia vitanao ny nandratra.
_
Mosoara tokan'izay no nanoratany ny tantàrany
ka nifandimbitao ny anaranao sy ny anarany
saingy teten-dranomaso no solon-teboka farany
io no ranomainty navelanao mba ho anjarany.
_
Izay mosoara tokan'izay hoy izy no LAY
izay namily ny Sambom-pitiavanareo hatr'izay,
nisedra onjam-pitia ka rendrika ilay SAMBO
ka sisa fahatsiarovana hono ity mosoara mando.
_
Izato ianao anefa dia ninia nanadino
namela dian-drangotra toa tsy nampino,
mora taminao ny namafa ny anarany
sy nandrodana ity fiarahana izay nisasarany
_
Ilay raozin'olondroa izay niarahanareo namafy
notangoinao ho an'olonkafa ka izy indray no niafy.
Tsy satry ho valiana ireny ka naleony nitomany,
« fantaro fa mbola fitiavany anao no dikan'izany. »
--------