RANOMASO TSY MAHALENA AFO (Heriarilala Andriamamonjy)

RANOMASO TSY MAHALENA AFO

Tsy hahalena afo ny ranomasonay pôeta
Be loatra ny ankaso, tafahoatra ny herisetra
Ny tanin-janakay no ataonao montsamontsana
Misamonta ny antsojay, nitobaka ilay nihontsana

Tsy hampitsimoka ny maina ny tomaninay mpanoratra
Ny efa karakaina va mbola mety ho lonaka ?
Izahay moa hanao inona rehefa izay no sitrakao
Saingy tsy ho azo ampanginina na dia somparanao.

“Tsy vitam-po onena na vitan-dranomaso”
hoy ny tononkiran’ireo mivavaka tsy ankiato
fifanampiana no ilaina na koa fandavan-tena
ka nahoana no simbaina itony firenena ?

Raha misy lonilony dia ao mifandamìna
Efa tsy tanty intsony ny resaka fiadiana
Fa tsy famotehana no hampiharina eto
Ny tanindrazanay aza arehitra, lehireto !

Heriarilala Andriamamonjy 10/10/2022
--------