sentom-pitia (Isiomanga)

Sento tokana mazàna
no injao manosika tsy tana,
ka mampifendro ny fanahiko.
Angamba sentom-pahakiviana,
vokatry ny faniriana,
tiako hivoaka fa tsy sahiko.

Hery tsy haiko vinaniana,
efa feheziko hangina,
nefa mikiry sy mitroatra.
Hery toa tsy ho lefy;
miezaka ny hihoa-pefy;
tena tsapako mivoatra.

Sento tokana! d' ilay sentoko maditra,
efa mameno ireo minitra;
toa tsy hisy fiafaràny,
d' ilay iraky ny foko,
efa leon' ny mitoloko,
ka mila naman' iantefàny.

Nefa, mo mba iza no handray,
izato mpivahiny iray,
ka hitsetra sy hangoraka.
Eny, handray tsy hisalasala,
izato vetsom-poko adala,
efa dodona ny hiantoraka.
--------