TSY IANAO (Ravo)

TSY IANAO...
(nalaina tamin'ny "AIKA", takila 39-40

Ianao ilay indray maraina
niantso ahy tan-dalana iny;
Ianao izay andrandraina
ho amin'ny fiainako ankehitriny.

Ianao indray 'sandratrandro,
niaraka tamiko nilalao;
Ianao ilay sahy nihambo
hahavita ho ahy izao sy izao.

Ianao ilay 'ndray tataovovonana
niara-nialokaloka iny;
ianao noheveriko hamaha olana
raha sendra misy tsiny.

Ianao ilay folakandro ireny,
niarahako nitsangatsangana;
Ianao noheveriko ombieny
fa hiaraka amiko hanangana...

Ianao ilay takariva iny,
niara-namindro amorom-patana;
Ianao niaraha-nitafasiry
teo amin'ny toeram-piandrasana.

Eny..., ianao ilay indray alina
niarahako tanaty nofy;
ianao no hoe mpamoha hanina
sady koa mpandrotsirotsy.

Fa TSY IANAO niaraka tamiko
no hanankinako ny dia,
TSY IANAO no hitantana ny ho aviko
fa ilay Tompo Befitia.

Ravo, André Vonjitsoa RAKOTOARIVELO
--------