Mbola henonao ? (Heriarilala Andriamamonjy)

Mbola henonao ?

Tompo ô !
Tsy nety reko intsony ilay feonao mamaly
Miezaka aho mitony fa tsy mety ho faly
Vaka izao ny saiko hoe tena misy ianao !
Marary anie ny aiko amin'ny zava-misy izao.

Tompo ô !
Moa tena avo loatra ilay efi-manasaraka ?
Sa izahay mpanota tsy mba mioty valim-bavaka ?
Sao vavabava-poana kosa no natosatosakay ?
Moa ny hatakay nivaona ka tsy sitrakao ry Ray ?

Kanefa ange ny marina, tsy nety renay ilay tena sitrakao,
mba tianay nofantarina, fa tsy hay hatramin'izao,
tsy nisy famantarana ho endrika fandavana,
Sarotra ny lalana ka niharam-pahavoazana.

Tompo ô !
Tsy tsiny no omeko raha manontany etoana
Ny ezako hatreto ve ho'aho verivery foana ?
Sa sedra ihany izao fa mbola ho tafita ?
Kanefa maro loatra ny sorona efa vita.

Eto ve ny farany, sa mbola handresy ihany ?
Te handingana aho, nefa tsy mety izany !
Fara-fiangaviana, meteza àry ho namako
Fa feno fahakiviana raha ts'isy anao ny lalako.

Heriarilala Andriamamonjy 16:31 17-11-25
--------