Haolo (Imbitika Rambala)

HAOLO,

Seva sy atsanga ary kindresy
No mpiandry tanàna sisa tavela
Rindrina rava efa resy dia resy
Tandindon'ny fiainana teo fahaela

Tsipoy sy fody no sisa misangy
Ny vero sy akondro eroa an-tokotany
Varavarana goaka tsy misy mpamangy
Làlana tototra tsy afaha-mankany

Ny siokan-jatovo, ny tendrim-baliha
Ny anganon'i dada ny hira ny dihy
Tsy azo inoana ho tsy nisy tao

Fa inona loatra no nisy tety
Lany tamingana sa resim-pitia
Ny mponina teto no lasa nandao

Imbitika Rambala - 20/02/91

—-----------------------------
--------