HO AN'IALAHY POETA SY IALAHY MPANAO GAZETY . (sahyman)

Toa te hiteny ialahy, te hidradra mihitsy
fa sarintsariny ihany
ny zo sy ny safidy;
fa resabe sy fitaka
ny tena fahafahana,
fa kabary lava ambony vavahady
ny sata sy saranga
lazaina fa mitovy.

Kanefa ialahy tsy afaka, na dia maniry mafy !

fa voafehy ny vava,
tadiavin' ny "mpitondra" ho vidiana vola

fa voafehy ny tànana,
k'izay tian'ny "ngeza" no asainy ambara lava

fa voafehy ny maso,
takonana abobo sy resa-politika

fa voafehy ny sofina,
tsy manan-jo hihaino ny marina rehetra .

Kanefa izao tsarovy, mpanoratra ialahy
mpanao gazety sambatra :
andry andrasanay hijoro am-pahasahiana,
loharano soa hamelon'aina anay matin-ketaheta,
afo sy fanilo hany manazava ny haizin-kitrokay,
tany itsanganan'ny tongotray marefo sy kere,
habakaba-manga antenaina hitondra fanan'ny johary !

Hangina ve ialahy ? ho moana an-tsitrapo
sa hanampi-maso, hanao raosy jamba ?
minia hanampi-tsofina, minia ho bemarenina,
sa hamonkon-tanana, hamihina ny azo ?

Mba saino ho'aho leiroa......
.....ho lo anie ny penina é !


facebook_Andy Rebabe_24 novambra 2012/sahyman
--------