AZAFADY TOMPOKO ! (Rasamindrakotroka Andry Tiana)

Mbola tsisy niantsa

Hangataka antsa
(Nalaina tao amin'ny vetso.serasera.org)
Teny iray tena fampiasa,
Isaky ny niteny teo aloha.
Miha adino, tsy dia faheno
firy kosa moa ankehitriny.
Sa efa vakoky ny lasa;
Tsy hivakiana loha moa?
Efa natobaky ny siny feno,
Zary sisa tsiahin'ny fahiny.

Teny iray nanan-danja,
Mariky ny fanajana koa.
Fandre foana isanandro,
Teny tsy nanam-paharoa.
Namiratra tsy lany manja,
Toy ny tanamasoandro.

Teny iray ary tena nihaja,
Taratry ny fahaiza-miaina;
Nametraka ny ray sy reny,
Avara-patana sy lalaina.
Mendrika homena lanja,
Hotiavina sy ho to teny.

Teny niloaka eo am-bava,
Rehefa nialoha ireo zoky;
Na rehefa nifanatri-tava,
Amin'ny manana na kamboty.
Teny tsy tokony ho hadino,
Ary tokony hampiasaina foana;
Dia ianao sy izaho dia hino,
Fa hilamina mandava-taona.

Teny iray mifono zava-maro,
Ekena ho lalam-pitondratena,
Na an-trano, na an-tanàna;
Na manana, na mananotena;
Na manadino, na mahatsiaro.
Fomba tsara, tsy azonao ialàna.

Teny iray feno fahendrena,
Ho fampiasan'ny rehetra;
Taratry ny harena anaty,
Soatoavin-ts’isy fetra.
Teny taratry ny fifanajana;
Mba tiana haverina indray,
Satria tsapa, tsy azo ialàna,
Anio, ampitso, rahatrizay.

RASAMINDRAKOTROKA Andry Tiana
02 Marsa 2017
--------
Rohy:
1384 7
Hevitra mandeha
s19andry5851 ( 25/03/2023 09:27)
AZA HADINO NY MANINDRY ILAY FO EO AMBONY IO MANAMARIKA NY FANDALOVANAO.
MANKASITRAKA TOMPOKO, SAMY HO TAHIAN'NY TOMPO HATRANY ISIKA !
Professeur Andry RASAMINDRAKOTROKA
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0114