You are here: home > Vetso

HONO HOY AHO RY MADAGASIKARA? - Rasamindrakotroka Andry Tiana

Azo vakiana?

HONO HOY AHO RY MADAGASIKARA?

Hono, hoy aho, ry Nosy Madagasikara,
Fanontaniana iray ity, apetraka aminao;
Fa maninona loatra re no lasa toy izao,
Ny fihodiny sy ny fizotran'ny tantara?

Izaho koa mba gaga, sady he talanjona;
Raha ny zava-misy tokoa no jerena,
Ananako daholo rehefa harena.
Ananako ny vina, ananako ny tanjona.

Jereo sy diniho, tany aloha rehetra tany;
Iza no tsy nahalala an’i Madagasikara.
Firenena tena kanto, ary tena tsara;
Maha te honina, tsy misy ohatra izany.

Ny ataon'ny Gasy ihany, no mahatonga izao.
Tena niova, nivadika, tsy tahaka ny taloha.
Be ny kolikoly, ny tsy mivaky loha,
Ao koa ny rediredy sy ry “be lazao”.

Raha jerena ianao, toa mahavariana ihany;
Tombanana madio, jerena toa maloto.
Ireto lalanao dia simba ka mampitotototo;
Ny lazanao anie, efa ratsy eran-tany.

Aza omena tsiny re, fa tsy fidiny ahy,
Izao manjo izao, satria ny hany faniriako,
Ho Nosy mandroso, izay no fifaliako.
Ho modely eran-tany, satria tena sahy.

Ra’ dinihina tokoa ianao : Nosy tena tsara.
Fa misy olona ao, manompo an-dRavola;
Trafikam-bolamena, taolan-dava, bolabola.
Ary mampalahelo: tena be no mamarara.

Ny harena ato amiko, tsy ho anareo ihany.
Ilaina hotsinjovina ny taranaka any aoriana.
Tsy tokony hisy mihitsy, ireo mpanoha riana;
Fa raha tsy izany, tena ho loza aman-tany!

Andao ary re hiaraka sy hifandamina isika.
Madagasikara hanome ny Gasy ireo harena;
Ny Gasy kosa hikajy, am-pitiavan-tsy terena.
Dia hisy fahombiazana, tsy hisy izay tomika.

Amin'izay angamba, tena handroso tsara;
Ity firenena be harena, tia an'Andriamanitra.
Ny mponina ao aminy, hankafy ny lanitra;
Raha tsy izany mantsy, hotsarain'ny tantara.

RASAMINDRAKOTROKA Andry Tiana
23 Janoary 2018