LALAM-PIAINANA (Rasamindrakotroka Andry Tiana)

Rehefa tonga ny hariva,
mamerovero feno hanitra,
ny masoandro koa madiva,
hilentika am-paravodilanitra

Maro ny adidy natrehana,
nisy ny nety, ny tsy nahomby,
ny hevi-maro, ny firehana,
ny feno tapany, ny tsy omby.

Nanombana ny ezaka efa vita,
nisaintsaina ny tsy tontosa,
namisavisa ny tsy mbola hita,
niketrika ny vina mba hisosa.

Lalam-piainana daholo izany,
Lalantokana tsy maintsy izorana,
miezaka manao ny mety hatrany,
na main'andro, na koa manorana.

Mila manana toe-tsaina miabo,
ny tsy mety ho honga lafatra
ka na ny tanivo na ny tanavo,
Mendrika vato amelan-kafatra.

RASAMINDRAKOTROKA Andry Tiana
16 Febroary 2025
--------