You are here: home > Vetso

MIEZAHA RAHA TE-HIAINA TSARA ! - Rasamindrakotroka Andry Tiana

Azo vakiana?

MIEZAHA RAHA TE-HIAINA TSARA

Ny fiainana an-tany, ekena mila fiezahana;
Isa-minitra, isan’ora, isanandro isanandro.
Ny asa fampandrosoana no tokony, hibahana;
Fa tsy zava-tsy misy dikany, mandany andro.

Ny fiainana hono, ho an’ireo mifoha maraina,
Sy miharitory, mamita ny tsy vita ny antoandro.
Mifofotra ihany, na mazoto na malaina;
Hiainana tsara, eto ambany masoandro.

Ny hatsembohan’ny tavanao no hihinanao hanina;
Valin-kasasarana isanandro, isanandro.
Ny fari-piainana hivoatra sy hilamina
Ho hita amin’ny tomban’ezaka isan-kerinandro.

Hihatsara eny hatrany ny fari-piainanao;
Arahim-pifaliana, ra’ miposaka masoandro.
Hiha metimety koa izay rehetra atao ;
Mahatsapa, mahatsiaro tsy nandany andro.

Koa ialao, halaviro ny trafikam-bolabola;
Mikapa an-tsokosoko ny tsy nisasarana,
Tsy andry intsony ny hivadihany vola,
Hiditra hibosesika eo am-baravarana.

Fadio ny migalabona amin-karem-pirenena,
Manararaotra toy ny hitsikitsika sy papango.
Ny rehetra mihamahantra, izy miavosa harena,
Satria ny saina efa zatra manao rapa-dango.

Aza hadinoina, ny fiainana anie mandalo ihany;
Hiposaka, hilentika foana ny masoandro.
Ny fiainana any ankoatra no irio hatrany;
Ho avy toa mpangalatra, na alina na antoandro.

RASAMINDRAKOTROKA Andry Tiana
13 Marsa 2017

Hevitra mandeha

s19andry5851 (04/06/2017 08:04:17)

Ankafizo dia zarazarao raha tianao !

sarindraravaloson (18/06/2020 08:28:11)

Marina tokoa izany, ny fiainana mandroso hatrany