NY FIAINANA FANETREN-TENA - Rasamindrakotroka Andry Tiana

Azo vakiana?

NY FIAINANA FANETREN-TENA

Mahavariana  ihany  rehefa  mandinika,
Ny zava-misy  amin'ny  andavanandro ;
Mandeha  ho  azy,  toa  vorona manidina,
Ireo teny atao amin'ireo olona madinika,
Mivoaka ny vava, maraina sy antoandro.
Teny  mandratra,  sy tena  mampidina,
Ny  "moraly" efa  tena latsaka  ambany ;
Mba tsy ilazana, mitrosina amin'ny tany.

Betsaka ireo miseho ho manan-tsaina,
Mihirahira  mampiasa  fitenim-bazaha ;
Tsy  mitsahatra  ny  manambony  tena,
Mihevitra  ny  hafa  ho  tsy misy saina,
Sy tena farahidiny tsy fanao fampitaha.
Noho izany ny mahantra sy mananotena,
Hono tokony halavitina mba tsy hifangaro,
Fa avela hijanona hanao asa tagnamaro.

Any   anatin'ireny  tambazotran-tserasera,
Feno  fampiderana  fiainana tonga lafatra :
Akanjo, sakafo, trano, fiara, ... antapitrisa,
Mandatsa, manapepo  ny tsy  misy  afera,
Izay  hita  sahirana, tsy  nety   tafakatra,
Ho  isan'ireo   alahatra  ho   mpanapitrisa ;
Fa nijanona nokilasiana ho isan’ireo balita,
Miandry  ny  fangorahan'ireo  any ampita.

Ka  mila  dinihina,  mila  eritreretina  ihany,
Ny fitenenana rehetra, sy ny fihetsika atao ;
Fa miteraka fahoriana,  alahelo ao  am-po,
Ny  zava-misy  amin'ny  fiainana  an-tany,
Ho an'ireo mahantra,  sy tsy  manan-katao,
Satria any amparany any samy mbola ho lo,
Ka tokony hiaina ao anatin'ny fanetren-tena,
Satria ny maina anio, ampitso mety ho lena.

FEHINY

Izay  manetry  tena  tokoa  no  asandratra ;
Amin’izay ny rehetra dia tena ho sambatra.

RASAMINDRAKOTROKA Andry Tiana
03 Janoary 2020

Hametraka hevitra

Midira aloha

Mombamomba

Mpanoratra : Rasamindrakotroka Andry Tiana

Nampiditra : s19andry5851
Daty : 13/01/2020
Mpamangy : 598
Mankafy : 5

Tononkalo hafa

HOY IANAO
MILA TONGA SAINA
MANINONA HOY AHO
NY RARINY SY NY HITSINY
EMBONA AN’I DADA
TSIARO AN'I NENY
MIEZAHA AMIN'NY HERIN'NY TENA
ILAY MBA FAHAIZANA KELY
ANDROM-PAHANTERANA
NY RAY SY NY RENY