You are here: home > Vetso

NY RAY SY NY RENY - Rasamindrakotroka Andry Tiana

Azo vakiana?

NY RAY SY NY RENY

Ireo  Ray sy Reny  izay nikolo,
Nandritra  ny  fotoana  maro.
Nanomboka  tany  ambohoka,
Nandalo ny andro fahazazana,
Nitohy tamin'ny fahatanorana,
Mety  hitatra  mihoatra izany.

Tena  niezaka,  nifofoha  volo,
Marain-tsy hariva tagnamaro ;
Na nitsangana io, na nihohoka,
Niasa   foana  tsy   nety  tana ;
Hatreny an-tsaha sy an-tanàna,
Raha  mbola tany koa  ny tany.

Ireo Ray  sy  Reny  izay  nihafy,
Nanao  ho  misy  ny  tsy misy,
Mba   ahatafita  ireo  taranany.
Nisambotra ny ho enti-manana,
Amin'ny vaninandro maha-ory,
Nisesisesy,   nitambatambatra.

Ka ho an'ireo zanany sy ireo zafy,
Hezaho sy  hataovy ny mba hisy,
Hanampiana ny sisa mba ananany.
Mba ilaharany ho isan'ny manana,
Lavitry ny  alahelo sy ny sorisory,
Ary hiaina hiadana sy ho sambatra.

RASAMINDRAKOTROKA Andry Tiana
17 Janoary 2020
  

Hametraka hevitra

Midira aloha