You are here: home > Vetso

NY TOKANTRANO - Rasamindrakotroka Andry Tiana

Azo vakiana?

NY TOKANTRANO

Ny tokantrano izay naorina, nanoloana ny alitara;
Tsy hitoetra fotsiny eny, hijanona ho tantara.
Fa tena hokojaina, amin’ny lafiny rehetra;
Ho lamban’akoho, ka ho tena aina no fetra.

Ny tokantrano toy ny landy, hoy ireo mpikabary;
Anatiny ao manatevina, mba tsy hisy ny mosary.
Hiezahana isanandro, ny hitomboan’ny tanimbary.
Ny tany efitra aza mantsy, ho rakotra voasary.

Ny tokontrano soa, tsy manisa be ho an’ny tena.
Fa ny fikirizana hatrany mba hananana harena;
Mba hahafahana miaina, ka tsy hisy ho sorena,
Na mijanona ao an-trano, na mivoaka miantsena.

Ka miorena tsara, ao an-tokantranonao;
Na mora io na sarotra, ny zavatra hatao.
Ho be ny fitsapana  amin’ny androm-piainanao;
Raha vonona hiatrika, tsy rava izao tontolo izao.

Ny tokantrano  mantsy, toy irony jiafotsy;
Vao mifampikasokasoka, na mavo io na fotsy.
Tonta tsy ialan-dromoromo, ary mety hamotsifotsy.
Ny fitiavana hamadika izany mba ho lasa rotsirotsy.

Ny tokantrano iray naorina, dia mba hiadanana.
Anilan’ny andefimandry, ary koa mba hiterahana.
Ka ho safononoky ny soa, amin’izay rehetra ananana.
Mangidy lavitry ny faty, mamy anaty hasambarana.

Ho tokantrano tsara fototra, ny tokantranonao.
Hanjakam-pifandeferana, amin’izay rehetra atao.
Ny fifankatiavana, hamadika ny tonta ho vao.
Tsy hadino, n’aiza n’aiza, ny ankohonanao.

RASAMINDRAKOTROKA Andry Tiana
11 Septambra 2016

Hevitra mandeha

s19andry5851 (04/06/2017 08:08:25)

Ankafizo dia zarazarao raha tianao !

s19andry5851 (24/05/2019 09:19:21)

Mila kajiana mandrakariva ny TOKANTRANO manditra ny androm-piainana rehetra. Rehefa tsara ny tokantrano dia mahomby amin'izay rehetra atao..
Ka miorena tsara, amin’ny tokantrano naorinao, eo ambany fitahiana sy ny fiarovan'i Tompo !"