You are here: home > Vetso

VADY VE ! - Rasamindrakotroka Andry Tiana

Azo vakiana?

VADY VE !

Vady ve ! Ilay miara-dàlana aminao,
Isan’andro isan’andro,
Na maraina na antoandro.
Vady ve ! Ilay olon-tokana,
Iaraha-mirona sy iaraha-midola,
Ao anaty angolangola.

Vady ve ! Ilay voavetsovetsonao foana,
Mandavan-taona,
Na voky na noana.
Vady ve ! Ilay fiantsoantsonao matetika,
Maraina sy hariva,
Ary eo mandrakariva.

Vady ve ! Ilay tsy azonao hadinoina,
Na faly na sorena,
Satria tena harena.
Vady ve ! Ilay hireharehanao,
Hiampifina sy hiankinana,
Raha tsy te-ho sahirana

Vady ve ! Tadidio mandrakariva,
Hampihantahantao satria tena anao,
Hatramin’izay ka hatramin’izao
Vady ve ! Ilay taolan-tehezana,
Tsy manan-tsiny, tokam-po toa ny siny,
Ka raha hadino, sao hananan-tsiny.

Vady ve ! Ilay mipetraka ravaky ny trano,
Tsy ariana sao angano,
Ka mba tazantazano.
Vady ve ! ilay mandeha ravaky ny làlana,
Na matetika na mahalana,
Ka omeo foana alàlana

Vady ve ! Tsy vodin-tsobika ka manan-tandrify,
Fa tena izy mihitsy, Ilay tena tandrify.
Vady ve ! Izy foana no eo, na taloha,
Na ankehitriny, na ho mandrakizay,
Ka atodiho any foana ny loha,
Fa sao hananan-tsiny, rahatrizay.

Vady ve ! Ilay natolotra ho anao,
Avy amin’i Jesoa Kristy sy Andriamanitra,
Mba hananao fiainana, hipoky ny soa,
Hatraty an-tany ka hatrany an-danitra !

RASAMINDRAKOTROKA Andry Tiana
22 Aogositra 2016

Hevitra mandeha

s19andry5851 (04/06/2017 10:10:34)

Ankafizo dia zarazarao raha tianao !

sarindraravaloson (18/06/2020 10:32:34)

Marina tokoa fa fanomezana sarobidy avy amin'Andriamanitra ny vady

Hametraka hevitra

Midira aloha