FAHAZAZANA (AORN)

Mijery ireto ankizy
Anaty fifaliana
Toa lavitry ny jaly
Dia satry koa hiverina
Hiaina ny taloha
Hitsiky sy hifaly

Jerena ireto izy
Misangy tsy amin’ahy
Manao izany am-po
Dia tsiaro no miverina
Lay nilalao fahiny
Niraisana avokoa

D’indreo fa mifanosika
Dia miaraka mianjera
Avy eo mifampitantana
Fa fony Mbola ankizy
Hatrany an-tanimbary
No miosina ny vantana

Fa Mbola hafa ihany
Izany fahazazana
Toa lavi-pahoriana
Raha Mbola ao anatiny
Dia hararaoty hatrany
Ataovy am-pitsikiana

AORN
02 SEPTAMBRA 2002
--------