NIFAMPITAONA (AORN)

Ho fahatsiarovana an'itpkl Ramaroson Janvier (107 taona) sy i Rasolofo Leon zanany, izay nifanao roa andro ka nifampitaona ho any amin'ny mandrakizay


Fa malok’antoandro toa raho-mitatao
Reo andro nandaozan’ireto havan-tiana
Fa ray sy ny zanaka no indro nandao
Nilefa tsy niera amy fianakaviana

Raha atao indray mijery ny zava-niseho
Tanaty herinandro namarana volana
Leon no nialoha...ka tsy nahaloam-peo
‘Ty Dada sadaikatra niatrika olana

Tomefy alahelo ty fon’ilay ray
Nahita 'ty menaky ny ainy tsy foiny
Lay zanaka tokony handevina indray
No dify ka tena tsy zakan’ny fony

Indrisy… roa andro taorian’izay
Nanjohy izany dia ka nilefa ny tany
Iray lalana ho any amy mandrakizay
'Ty dada efa gina toa ontsa, tomany

Raha atao jery todika aloha ny tantara
Leon tsy mba niala, nanjohy teny foana
Nanampy ny maro.. no mpiandry tanana
Nanao tamy fo, tsy nitsitsy fotoana

Fa na fokontany na asam-baomiera
Na asa iraisan’ireo fokonolona
Tsy miandry marary izy… tonga amy lera
Fa rehefa adidy dia lasa mitolona

Raha Ramaroson Janvier no jerena
Akanga tavela ary koa tsangam-bato
Niahy ireo madinika, tsy tia tena
Naharitra ela fa fito amy zato

Fa raiamandreny tsongoin’olom-bolo
No sady mpanampy sy mpanoro lalana
Nahavita nitaiza sy nanolokolo
No sady mpandala sy tia fihavanana

Ankoatra an’izay, tena nanam-pinoana
Moa ny andefomandriny koa toy izany
Fa afo tsy maty sy tsy azo vonoina
Lay fitiavam-bavaka tsy nety lany

Angamba ianao mety ho gaga sy sina
Fa lasa izy ireo mbola nifampitaona
Ny Tompo nandahatra, k’aleo mangina
Fa Izy mahalala ny vanim-potoana

Mandria am-piadanana ianareo mianaka

AORN
04 JONA 2025
--------