You are here: home > Vetso

Indro... - Dox

Indro ny Zanakavavin'ny Alina
Hiroboka anatin'ny Lanitra lalina...
'Ndeha handro izy iny...

Ny volony lava toa setroka oly,
Ny maso baliakany toa hanangoly...
Mandrendri-bahiny!...

Mba mahina angaha sao misy mahita
Ka miherika im-polo..., kinanjo eny am-pita
dia indro tokoa...

Ingahy masoandro misalotra mena
malaina handao an'ity fijerena
An-dRavolana soa!...

Dia indro fa nihaona ny masony roa
Ka menatra indrindra Ravolana soa
Noraisiny haingana

'lay rahona kely mba sendra nandalo
ho enti-manafy an'ity tena mimalo
tsy ho hita mivaingana...

Nandrasany teo ny hiaingan'i Mazava...
Vao 'zay izy sahy nampiseho ny tava!
...Dia tena nitranga!

Nisosa malako, nandeha nilomano
namaky ny ony 'zay manganohano:
Ny lanitra manga!

1938

Hevitra mandeha

karako (31/07/2006 11:54:35)

Tononkalon'i Dox mitory hatsarana ka tsy leo mihitsy aho mamaky azy io. Mitory hatsarana nefa koa maneho ny fahaizan'i Dox miangaly ity tantara ity... Mankasitraka e!

hery (09/06/2019 06:07:14)

Lalina be. Voakajy daholo na ny endrika na ny gadona na ny hevitra fonosiny...

Tena mila tononkalo tahaka itony amin'izao fotoana izao.

ikalamako (09/06/2019 11:24:35)

Hery : ngadona fa tsy gadona. Mba hahitsiko fa izaho koa aza vao haingana tato amin'ny "vetso serasera" tato vao nahay ;)

rfanomezantoky (24/09/2019 12:47:03)

Kanto! Izay ihany no azo ambara

Hametraka hevitra

Midira aloha

Mombamomba

Mpanoratra : Dox


Nampiditra : karako
Daty : 31/07/2006
Mpamangy : 11463
Mankafy : 6

Tononkalo hafa

Andriambavin'ny fitia
Endrika
NANKAIZA?
Izy mirahavavy
Fa fitiavako hianao
Rivotra aza aho...
Ao....
Misy
Teo amin'ny valsa
ASA IZANY...