HAFATRA (MAZ RAMANA)

Na ho aiza ianao, na ho aiza...
Ho tsinjonao foana ny aloky ny tenanao
Na hazava na ho mainty ny lanitra eny ambony!

Na manta, na ho loa...
Efa nisy vokany ny voa nafafinao
Tamilay toeran-dasa, tsy hiverenanao intsony!

Na hiteny, na hangina...
Manangatra any ho any : ireo velona sy maty
Nanamboatra fomba fiaina nohon'ny vavaratsinao!

Na ho tody, na ho tsiny...
Tsy manana anjara amin'ny fiainan'izy ireny
Raha ninia nanototra azy ny andry niankinany!

Na hitsiky na hisento...
Tsy mahay mamoifo : Ny tena vehivavy
Fa mandanja ka mihataka izay tena fahavalony!

Na kafara na ho hafatra...
Tsy atao tsinontsinona : ny Fo miankin-doha
Mba tsy hampivadika azy ho poizi-mahafaty!

Na tsy nosoratako aza...
Dia efa any ampon'ny manam-pandeferana
Ny fetran'ny hatreto, fatran-danja fara-zakany!


Anjaramalala RAMANAMANJATO
22/09/2021 à 12H39
--------