INY VADIKO INY (NofenoinaNatiora)

INY VADIKO INY

Iny vadiko iny
Ilay tsy mba mitsitsy teny mamy atolotra ahy,
Iny vadiko iny
Ilay atsasaky ny saiko, itokiako raha manahy

Iny vadiko iny
Ilay milaza foana foana hoe "tena tiako ianao"
Iny vadiko iny
Ilay manara-dia an-tsaiko am'zay rehetra atao

Iny vadiko iny
Tsy mba mamela ahy ho tezitra ela izany,
Fa iny vadiko iny
Ilay manao 'zay hampilamina ny adinay hatrany

Dia iny vadiko iny
Ilay miaritra harerahana hahasoa ny fiainanay,
Iny vadiko iny
Ilay hahatsapan'ny zanakay hoe tena manan-dRay

iny vadiko iny
Ilay tokana mahazaka an'ireo kilema toetrako,
Mbola iny vadiko iny
Ilay mitia ahy foana amin'ny endrika sy paozy rehetra rehetrako
(na ratsy izay na tsara)

Saingy koa,
Izaho vadiny ihany
No ihany koa mahazaka ireo kileman-toetrany,
Ary izaho vadiny ihany
Ilay mahavita mitaty ny ratraratra alefany

Izaho vadiny ihany
Ilay mikarakara sy manome fitia azy tsy tambazan-tsarany,
Ary izaho Ilay vady tiany
Mampitsimoka aina mitondra ny taranany...

Izahay mivady
Ilay mampitombo ny fitia ho onitr'ireo adiady
Izahay mivady
Mahavadi-bainga satria tanana sy angady.

NOFENOINA NATIORA NITSIMOKA
24 Febroary 2026
--------