VONINKAZO DIA (Riantsoa)

Misy ny fitia
vao mianatra mamony
dia voninkazo dia
no nofidian'ny fony;
fa mantsy tafahoatry
ny fetran'ny tontolony
'lay sary kanto loatry
ny endrika natolony.

Nandalo dia niserana
ilay endrika narentiny,
kanefa fanaperana
ny fifaliana nentiny.

Fikopaky ny raviny,
mambabo ny tontolo,
kanefa ny hoaviny
makiana, bobongolo.

Ny rivotra naritsony
mamelombelon'aina,
kanefa ny ampitsony
tsy azo antenaina.

Hanitra mihento
no fanomen'ny felany,
kanefa sentosento
no emboka navelany.

mibohy nofy mamy
ilay fipelipeliny
nandraraka an-tany
ny vony mavokeliny.

Fa sary kanto loatra
no endrika natolony,
nanjary tafahoatry
ny fetran'ny tontolony.

Indrisy, ry Fitia
vao mianatra mamony,
raha voninkazo dia
no nofidian'ny fony.

RIANTSOA (03/12/2011)
--------