MIANARA (Ny Andrianary )

Nomeny anao ny tany,
Dia ao ianao manovo ny atao hoe fahavelomana.
Saingy nisy foana ihany
Nentim-bitan-dratsy naka samirery ny tombotsoa iombonana.

Nasiana ny fianarana,
Ho ampinga enti-miady amin'ny fanambakana
Fa ao ireo tsy manana
Tsy mba nanovo izany ka nobadoin'ireo nahita fahalalana.

Nankaiza ireo takalo,
Antom-pivelomana sy vonjy aina mahaefa adidy?
Tsy misy mahatsiaro
Fa natakalo varotra ho fanjakan'ny vola sy izay mety ho sarobidy.

Ny kolontsaina teto
Nohamavoina ho ratsy mba hidiran'ny an'ireo vahina,
Ka ny mpanefoefo
Manambany ny ambany, toa saina mifanipaka no hita ankehitriny

Dia aza gaga isika,
Fa be ny fahantrana iainantsika gasy ambany fahefana,
Gasy anapitrisa
No indreo miandry mana,manantena fahagagana.

Taloha ny fihavanana
Nanjakazaka mihitsy nahavitsy fahavalo sy nahamaro tombontsoa.
Fa izao na eny an-dalana
Mitandrina sy mailo,be ireo dahalo,ny asa ratsy hafa koa.

Satria potika ny maha gasy
Natao ho rehareha sy hahitana fandrosoana !
Izao ny iray aina sy ny iray vatsy
Efa tenin'olom-bitsy tsy nanaiky ny nobadoina.

Mitady asa ianao, eto fa tsy andafy
Fa adinina aminao ny fahaizan-tasatasy sy ny teny hafa tsy haiko !
Izany no takiana ho hain'ny Malagasy
Fa ny angady sy ny tany tsy mahavita anao ry Sombinaiko.

Ka etsy mianara,
Fa io no tena tohatra hiakarana ho tafita !
Milofosa tsara
Ho tonga harena miafina tsy misy afaka mahita!

Ny Andrianary (2017)
--------