Vinanin-diavolana . (randria)

mangina sady tony ny tany tontolo,
reraky ny andro ka de nifanolo,
tamin'ny ali- mamiratra sy mibaliaka,
tsy nosalovan-drahona lay volan-tsariaka .
ny ao anatiko anefa tao maloka lava,
ny andro-ratsin'ny foko tsy mety misava,
akipy ny maso mifoha ny ao an-tsaina,
andrasana ho tony vao manaintaina .
maneso ny fiainako va re ty voahary ?
maneho ty ankantony miharihary...
reo kintana an'aliny mihamikamina,
ny volana feno tsy nosinganina .
dia lasa ty vetso nisodika tany,
nitety reo vohitry ny olom-binany,
hisambotra lay rambon-damban'ny lasa,
ho entiko hamaly ty foko voarasa .
kanefa aho sadaikatry ny alin-diavolana,
mitory hatsarana sy vaha tsara olana,
sinafon'ny ambitafiotran'ny mamaton'alina,
hany hery sy tokin'ireo tsy tafarina .
ny rivo-nifafy nitsoaka fahadiovana,
mampahatsiahy ilay idealy tandrovana,
dia ny hikan'ny saina tsy mila herisetra,
milaza fa misy ny rariny tokony hitoetra .
sondriana aho ka hana nandinika izany,
angamba nipaka ny faran'ny tany,
ny voahary anatrehako koa tony de tony,
ny masoko revo eny an-danitra ambony .
nony ela ny ela dia... nody ny saiko,
Ary tsapako maivana hatramin'ny aiko,
Minitra miselona, mba nandaozan' ny olana...
velon-tsento ny tsiaro : dia lay alin-diavolana...
R.J.O.
--------