RAHA SENDRA SAROTRA (Ravelojaona)

Raha henjana ny làlana,
Mideza sady lavitra,
Mampiravy tànana,
Tsy maha-te hiaritra,

Dia izao no ‘ndeha hatao:

Ataovy indray mijery,
Tsy hijanonan’ela izay hoe mbola hizorana,
Ka diavo tsy an-kiteny,
Tsy an-kisaina akory izay mety ho ranon’orana.

Mandehàna, aza mihemotra,
Fa aza mba fanao ny resy tsy miady
Ny saina no aoka ho hentitra,
Hoe: natao hahita izay vonona hitady.

Avelao ny omaly,
Itsikio ny anio, antenao ny ampitso,
Izay no aoka hamaly,
Ny mety ho fanahiana sy fiheveran-diso

Raha misy tany hay,
Makina fa tsy maintsy natao holalovana,
Ho avy aorian’izay,
Ny igoha-ranon’aina ho tambi-pahatsiarovana.

Ravelojaona, Desambra 2002
--------