INY DIAM-PENIKO INY (RH Mayam)

Iny diam-peniko iny
mba araho maso kely,
Fa mbola zazakely
mianatra miteny;
Mbola fanahin-jaza,
ka aza atao mahagaga
raha miteniteny foana,
na mivolan-tsy tsaroana.

Iny diam-peniko iny
aza dia melohinao
fa zanako iny mantsy!
Mbola mila nonon-dreny
hoentiny ho vatsy
Ka ahitsio fa adala!
Aza omena tsiny
raha mbola tsy mahalala.

Iny diam-peniko iny
no namako ianteherako
amin'izao adiko izao
Ka amin'ny andro fahanterako,
dia izy indray no hikolo
sy hanangana ireo rava
Fa izaho kosa...hikombom-bava!
Ka ny iangaviako anao
raha tena sitrakao!
Iny diam-peniko iny...
aza dia omena tsiny.
--------