Androany maraina! (tsiolaka)

Tao ambany tetezana androany maraina?
Loza lehiretsy! ... dia nahoana loatra?
Fa dia nisy nanary an'ity sombiniainy,
Mbola zaza miraikitra amy tadimpoitra

Ireo izay nahita dia samy nitsetra
nahita ity vatana kely afaka aina
Nanatsiny ny reny ny rehetra rehetra
hoe olon-tsy vanona tsy misy saina

Fa olon'iza loatra ary itony?
Hoy ireo tezitra,nivaky nanozona
Tena efa biby mifanahin-demony
Tsy mendrika ho velona fa fanapoizina.

Fa ny saiko dia lasa,naniry ahalala
fa toa tsy mba misy nanozona an-drainy?
izay tompon'andraikitra tsy afaka miala
amin'ny fahafatesan'ity sombiniainy!

Tao ambany tetezana androany maraina?
Noho ny anjorian'ny ray sy ny reny
dia zaza vao teraka no afaka aina
Ry Ray ao ambony ô!mamelà azy ireny.
--------