Mitady namana (Vaoarilala Andriantsifanetra Rakotoarijaona)

Mbola tsisy niantsa

Hangataka antsa
(Nalaina tao amin'ny vetso.serasera.org)
tsy mitsikera ny safidinao aho raha manoratra ity tononkalo ity, fa velom-panontaniana: fitiavana sa lamaody?


Mitady namana


Ny fahoriana hono ry lahy mahazaka maniraka
Ka manararaotra tokoa ireo izay be mpamitaka
Mba hialana amin’ity atao hoe tsy fisiana
Hamidy ny tanindrazana dia mitsaoka mangina

Ny sasany kosa dia tena lasa lavitra ny sainy
Ka mpanelanelana na mpanera mpivady no hainy
Dia io mihintsy no ataony anton’asa fivelomana
Hisarihana ireo izay mikatsaka leo fitolomana


Katalaogy iray no sendra tazako tany ho any
Ka nahafinaritra ahy ireo takelaka feno modely
Fa raha sendra ilay telo farany aho izany
Dia tena gaga amin’ireto manao vazaha toa anjely

Fa ny tena nahatalanjona sy mampiteny ny moana
Dia ity vehivavy iray vatombatony ihany raha ny taona
Toa vonona tanteraka toa tsy misy ahiahy
Nefa koa dia mihaotra sao sembana rahalehilahy

Dia nozahako ilay pejy, nalalaliniko, ka zendana aho
Manonofy tokoa ve , sa mba kilalao sy sangisangy
Ka raha ny fanisako dia folo, roapolo ny malagasy tao
Rehefa zohina ilay izy dia tsy mba vandivandy

Tsy sanatria mitsaratsara na mitsikera izay atao
Fa ilay hery nanentana no mampieritreritra kely
Ny fiainana ve, samia manao izay tiany atao
Fa aza heverinao fa any ivelany tsy misy afa tsy tantely

Ao tokoa ny sendra ilay volamena , vatosoa
Voatondraka hatramin’ireo mpiray –tampo
Ka voakolokolo tsara toa voninkazo manitra
Ka inona no lazaina moa ve tsy mahafinaritra

Fa maromaro ihany ireo izay naniry fiadanana
Ka misavorovoro na fanahy na saina, ka mitaraina
Satria ilay nantenaina fa ho namana fitiavana
Dia tena goaika sy biby tokoa ka zary toa nangaina

Ka akory atao nilaozana ilay akany niavina
Dia voatery misotro rano mangidy tsy tiana
Dia tsy maintsy mihezaka mampahery tena mangina
Sa izay ilay hoe, ny nenina tsy aloha fa aoriana

Ny any azonao atao raha, sendra ilay ratsy ianao
Dia hanaro ireo zandrinao na malagasy toa anao
Mba tsy ho azon’ny nofinofy hoe paradisa
Kay ilay tany nohevina ho soa mahafeno disadisa

Eny tokoa ,ankoso-bolamena,mamiratra jerena
Noheverina kanto sy soa ilay firenena
Kanjo ilay sary mahafinaritra anaty boky
Dia natao fotsiny mba hanomezan- toky

Raha ny tena marina , faniriana tsy takatry ny vintana
Ilay sary paradisa , fiainana , fiadanana feno kintana
Dia tsy natao ho an’ny sarambabem-bahoaka
Sainga rehefa roso lalina dia aleo tsy milaoka

Sao varivarian’ny lavitra ka manary ny efa nihary
Ny safidy ange tsy an’olo fa an-janahary
Izay ve no heverina fa hahasoa ny ho avy
Ka nahoana no tsy maintsy misara-mianakavy
--------
Rohy:
2325 1
Hevitra mandeha
Anjoroma ( 27/01/2013 05:42)

Lalina loatra ity tononkalo ity, satria betsaka tokoa ny zavatra efa tsapan'ny mpanoratra nefa nozakainy izany, tsy ampiambahamba !

Feli
Hametraka hevitra
Midira aloha
Momba ny tononkalo
Mpanoratra : Vaoarilala Andriantsifanetra Rakotoarijaona
Nampiditra : nofinofy
Daty : 10/06/2004 21:40
Antsantononkalo

Mbola tsisy niantsa

Hangataka antsa Hampiditra feo
© Eugene Heriniaina - serasera.org 1999 - 2024 - page load 0.0135