voninkazo tsy halazoko (Andrin'ny Avo)

Tsy misy mamy noho ny fary ra' mbola samy hazo,
Manitra aok'izany koa ny lisy ra' mbola samy voninkazo;
fa ny tahom-pary dia hatsatso, ho ariana koa ny faikany
ary ny lisy mbola halazo noho ny hatsiaka izay tsy laitrany;

fa ny maminao ry tiako no ilay mamy izay maharitra
ny endrikao mamerovero toy ny vonikazo manitra
ny felanao naniry, ka ho tonga hanaka-danitra,
toy ny raosy diha voadidin-tsilo, sady soa no maranitra,

ka nampihaotra ny tanako, 'zay nanahy ny ho voaratra,
mba ampianaro handray anao fa tsy mbola mety zatra.
Te hisafo, te hihoroka, kanefa injay nihemo-dava,
mba mivelara ho eo an-tanako, ka ny tahotro hisava,

Ianao no mamiko, voninkazo ho koloiko, tsy hotazako,
voninkazo vaovao izay antsoiko hoe malalako,
hamelam-pahendrena, hamoa fahalala, ho reharehako,
ka ny dianao no izorako, ny lalanao no alehako.
--------