HO FIRENENA SANGANY (Rasamindrakotroka Andry Tiana)

Nantsain'i s19andry5851
Nantsain'i s19andry5851
(Nalaina tao amin'ny vetso.serasera.org)
Raha te hivoatra eo amin'ny fiainana ;
Mila miova tanteraka ny foto-pisainana.
Miezaka miala amin'ny mangata-dava ;
Vao maraina miasa ny zavona hisava.

Ilaozana ny fihetsika mampandry adrisa,
Mandoka tena foana anefa mampikorisa.
Fiaraha-mientana hivoatra no tena ilaina ;
Tsy hampanantena lava no foto-pisaina.

Beazina ny rehetra hanan-tsaina miabo ;
Hijoro, hitraka tsy handohalika toa babo.
Ialàna izay rehetra heverina ho tarazo,
Ny fisainan-dresy lava tsy avela hahazo.

Ezahina hatsaraina ny sehi-panabeazana,
Hifanandrify amin'ny filan'ny tanindrazana ;
Fiatrehina mavitrika no tokony hirosoana,
Hitondra hery vao ho an'ny fampandrosoana.

Ny tomponandraikitra isan'ambaratonga,
Mba tena hifofotra tsy hanao somonga.
Handinika lalina izay hivoaran'ny Nosy ;
Tsy lany andro mangataka toa androrosy.

Trandrahana ara-drariny ny mety ho harena ;
Fampandrosoana isam-paritra tena jerena.
Tsy misy atao antsisim-bala ny Malagasy ;
Samy tompon-tany, tsisy avela hangasihasy.

Manomboka izao ny hany atao an-tsaina,
Madagasikara mandroso no volavolaina.
Miara-miezaka, mifofotra ahazoany laka,
Ho lasa Firenena sangany sy tompon-daka.

RASAMINDRAKOTROKA Andry Tiana
19 Septambra 2022
--------
Rohy:
Sokajy : Tanindrazana - fiainana
893 4
Hevitra mandeha
s19andry5851 ( 25/03/2023 04:19)
AZA HADINO NY MANINDRY ILAY FO EO AMBONY IO MANAMARIKA NY FANDALOVANAO.
MANKASITRAKA TOMPOKO, SAMY HO TAHIAN'NY TOMPO HATRANY ISIKA !
Professeur Andry RASAMINDRAKOTROKA
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0108