Vetsovetso takariva (Eliza Freda)

Nantsain'i
(Nalaina tao amin'ny vetso.serasera.org)
Singan'olona toa very izany izaho,
Ravin-kazo tafasaraka aman-taho,
Tapak'ahitra entin-drano ka indrisy!
'Zay mba toeran-kitodiana toa tsy hisy!

Zana-borona nanintsana elatra aho,
Raiki-tahotry ny oram-be mitraho;
Tsy mba zatry ny fanalan-keniheny
Ka maniry hombomban' ny ela-dReny!

Ombimanga diso ala mantsy aho, io
Manin-kavana tsy foy ka mitalaho.
Any am-badika, atsimon'iny bainga,
' Zay milaza tsy hisento dia mandainga!

Mpivahiny mbola lavi-dalana aho;
Raha sendra tianareo mba iaraho,
Aza ilaozana midify, fa andraso,
E! ry Vorona eny Ampamoizamaso!

Manantena sady miandry fatratra aho,
Ka ny taratrao, ry Volana, apariaho!
Dia vimbino izany alahelo izany,
Fa ianao no tazana eto, tsinjo any!

O! ry Kintana, ombay manatrika aho,
Mila tsy ho very dia ka iresaho!
Ianareo eo no solon-kava-mahatratra
Hilazako'zay mba zavatra mihatra!

Singan'olona toa very izany izaho,
Sao dia tolan'ny manjo ka ivavaho,
ry Zoky I ry Zandry hany fara!
Tsofy rano mba ho tonga soa aman-tsara!

Dia veloma sy masina indrindra, ho'aho!
Ny fiarovan'ny Tsitoha no angataho,
'Zany " Sandriny Mahery " tsy hiala,
Fa hivimbina ny dian'ilay malala!
--------
Rohy:
1156 3
Hametraka hevitra
Midira aloha
Momba ny tononkalo
Mpanoratra : Eliza Freda
Nampiditra : jantina
Daty : 08/08/2019 19:34
Antsantononkalo
Nantsain'i
© Eugene Heriniaina - serasera.org 1999 - 2024 - page load 0.0101