Ny havana (Imbitika Rambala)

NY HAVANA

Mba sambatra lahy itony ambiaty
Ririnina tsy mba mihintsana
Lohataona mamelana foana
Fahavaratra mandrobona aok’izany

Ataovy toa izany ny fitiavan-kavana

Aza atao hoe :
Soasoa no ataon-drahavana
Ka dia tsiriry mpiandry farihy izahay
Hitsikitsika mpandry tanàna
Sarivazo tsy mandao havana

Fa raha ratsiratsy ny ao amin-drahavana
Dia tsiriry vorona izahay
manifi-drano dia lasa
Aleonay monina an’anosy
Fa sao hampivoady andro hariva

Aza omena ambiny ny havana
Aza omena sisa
Fa ny soa atao an-kavana
Tsy mba sitraka andro nanaovana azy

Ary aza tia havan’olona
Ka mankahala ny havan’ny tena
Fa ny olon-kafa ange ka vary aloha e
Satria ny olon-kafa manana ny azy
Ny havan’olona toa rano an-tamim-bato
Jerena manjelatra
Tovozina tsy ahazoana

Koa
Ny fitiavan-kavana tsy boraborahina
Satria toy ny voara malandilandy
Raha vakiana feno aloy
Ny anatra ataon-kavana
Dia anatra soa maharary
Tsy mba anatra fa ody aina

Mahareta ny ratsy antaon-kavana
Ary mahandrasa ny soa mbola ho avy
Fa ny heloka ibabohana mody rariny

Koa
Asakasakareo mahavita ratsy amin-kavana
Fa izay mahavita be no manenina

Imbitika Rambala - 02/01/2020
--------