RAKITRA (MiséVonjy)

Ho raketiko an-tsoratra, ny senton’ny fo, nateraky ny tsiahy
hisolo ireto holatra, tsy mba nety lo, tsy nahasaraka ahy.

Ho soratako ao, ny kiakan’olo-tia, tojo fifaliana
fa tsy mba kilalao, ilay isika niara-dia, tsy mba nokaliana.

Ka rehefa iny, mitamberina ny lasa, tonga tsy nantsoina,
ho raisiko ilay episitily, feno ny fikasa, tsy mba nokaloina.

Ventesiko irery, ireo sento niarahana, tanatin’ny lanitra
voarakitra tsy very, tsy nisy nangalana fa namerovero manitra.
--------