MBA TANDREMO IHANY E! (Rasamindrakotroka Andry Tiana)

Mba tandremo ihany e ny aloaky ny vava!
Fa mety mandratra izay rehetra mihaino;
Indrindra raha mipoaka sy miverina lava.
Mba diniho sy fanteno ary koa saintsaino.

Mba tandremo ihany e ny fihetsika aseho!
Eny imasom-bahoaka fa maro ny mpisehatra,
Manaraka akaiky izay rehetra hiseho.
Tsy misy aza foronina ka ny misy tsy arehitra!

Mba tandremo ihany e ny akanjo hanaovana!
Ho akanjo maotina tsy mandratra maso.
Fa raha tsy izany dia tena ho lasa fitaovana,
Hifalian’ny mpijanga sy mpanasohaso.

Mba tandremo ihany e ny fiainan-tokantrano!
Tsy ahahaka, tsy entina ankalamanjana.
Fa ny rano raraka mety hampiditra angano;
Toy ny omby mifanosika, miady an-kijana.

Mba tandremo ihany e ny asa iandraiketana!
Tanteraho amin-kaja ho voninahitry ny tena.
Izay rehetra vita tsara tena ho fahafinaretana,
No hitondra fandrosoana sy fahaleovantena.

Mba tandremo ihany e ireo mpiara-monina!
Izay iarahanao miaina isanandro isanandro.
Fadio ny fihetsika, ny toetra mampitambolona,
Ho fitoniana hatrany eo amin'ny andavanandro.

RASAMINDRAKOTROKA Andry Tiana
19 Marsa 2019
--------